ხელისუფლების ანგარიშვალდებულებისა და სამოქალაქო აქტივიზმის მხარდაჭერის მიზნით, არასამთავრობო ორგანიზაციებმა გაეროს განვითარების პროგრამისგან (UNDP) საგრანტო დახმარება მიიღეს. საგრანტო პროგრამა დანიის მთავრობის მიერ დაფინანსებული ფართომასშტაბიანი ინიციატივის ნაწილია, რომელიც საქართველოში კარგი მმართველობის განვითარებას ემსახურება და რომლის მთლიანი ბიუჯეტი 4 მილიონ აშშ დოლარს შეადგენს.   

ჯამში საგრანტო დახმარება მიიღო 18-მა ადგილობრივმა ორგანიზაციამ, რომელიც იმერეთის, მცხეთა-მთიანეთის, ქვემო ქართლის, გურიის, სამეგრელო-ზემო სვანეთისა და რაჭა-ლეჩხუმ-ქვემო სვანეთის 31 მუნიციპალიტეტში 11 პროექტს განახორციელებს. თითოეული პროექტის ბიუჯეტი 30,000 აშშ დოლარს აღწევს, ხოლო საგრანტო პროგრამის მთლიანი ღირებულება 315,000 აშშ დოლარია. ამ ინიციატივის შედეგებით 3,000-ზე მეტი მოქალაქე უშუალოდ ისარგებლებს.

გრანტის მიმღები პროექტები შეირჩა კონკურსის მეშვეობით. მათი განხორციელება  ხელს შეუწყობს მოქალაქეთა მეტ მონაწილეობას გადაწყვეტილების მიღებასა და განხორციელებაში ადგილობრივ დონეზე. განსაკუთრებული ყურადღება ქალების, ახალგაზრდებისა და ეროვნული უმცირესობების ჩართულობას ექცევა.

„სამოქალაქო ჩართულობა აუცილებელია იმისთვის, რომ ადგილობრივმა ხელისუფლებამ არსებული საჭიროებების შესაბამისად იმოქმედოს. საქართველოში მოქალაქეთა ჩართულობა კვლავ გამოწვევაა. სწორედ ამიტომ ჩვენი მიზანია ხელი შეუწყოთ  უფრო ღია გარემოს შექმნას, სადაც ადგილობრივი მოსახლეობა შეძლებს აქტიური მონაწილეობა მიიღოს მისთვის მნიშვნელოვანი  საკითხების მოგვარებაში”, - განაცხადა UNDP-ის ხელმძღვანელმა ლუიზა ვინტონმა.

ადგილობრივი პროექტების განხორციელების შედეგად გაიზრდება მოქალაქეთა, თვითმმართველობისა და სხვა ადგილობრივი მოთამაშეების თანამშრომლობა და ამავდროულად დაიხვეწება სამოქალაქო ჩართულობის სხვადასხვა ხელმისაწვდომი მექანიზმი.

გრანტის მიმღები ორგანიზაციები ხელს შეუწყობენ პეტიციების კულტურის განვითარებას, მოქალაქეთა მონაწილეობის გაზრდას სამოქალაქო მრჩეველთა საბჭოების მუშაობაში და სამოქალაქო ჩართულობის პრაქტიკული ხელსაწყოების, მათ შორის ონლაინ პლატფორმების შესახებ ინფორმაციის გავრცელებას.

მაგალითად, ქვემო ქართლში UNDP-ის გრანტების მეშვეობით დაფინანსდება ახალგაზრდული ინიციატივები, განვითარდება სამოქალაქო მოხალისეობა და სოციალური მედიის პლატფორმების გამოყენება ადგილობრივი საკითხების მოსაგვარებლად.

იმერეთში სამოქალაქო საზოგადოების პროექტების მეშვეობით შეიქმნება სადისკუსიო სივრცე ადგილობრივი ხელისუფლების, სამოქალაქო აქტივისტებისა და ბიზნესისთვის. აგრეთვე გაიზრდება მოქალაქეთა ჩართულობა მუნიციპალური ბიუჯეტების დაგეგმვაში.

გურიაში გაეროს განვითარების პროგრამის გრანტი დაეხმარება ადგილობრივ "ჩართულობის აკადემიას" დეცენტრალიზაციისა და საზოგადოებრივი ჩართულობის საგანმანათლებლო პროგრამების ორგანიზებაში, ხოლო სამეგრელო-ზემო-სვანეთში ადგილობრივი ორგანიზაციები ხელს შეუწყობენ საზოგადოებრივი პეტიციების წარდგენასა და მოწყვლადი ჯგუფების დაცვას, მათ შორის იძულებით გადაადგილებული პირების, შეზღუდული შესაძლებლობის მქონე ადამიანების, ხანდაზმულებისა და ოჯახური მზრუნველობის გარეშე მყოფი ბავშვების.

მოქალაქეთა ჩართულობის გაზრდა ხაზგასმულია 2020-2025 წლების დეცენტრალიზაციის ეროვნულ სტრატეგიაში, რომელიც  საქართველომ გაეროს განვითარების პროგრამის ხელშეწყობით შეიმუშავა და  2019 წლის დეკემბერში მიიღო.

UNDP-სა და დანიის მთავრობის საგრანტო პროგრამა ეხმიანება აღნიშნული სტრატეგიის მიზნებს და ხელს უწყობს მოქალაქეთა მონაწილეობის გაზრდას გადაწყვეტილების მიღების პროცესში ადგილობრივ დონეზე.

საკონტაქტო ინფორმაცია

• სოფო ჭიჭინაძე, UNDP, +995 599 196907, sophie.tchitchinadze@undp.org
• მაგდა ნოვაკოვსკა, UNDP, +995 598 822544, magdalena.nowakowska@undp.org